قصص منوعة

تصحى فريدة مفزوعة:ايوة ايوة..
تقوم بسنت مفزوعة:فيه ايه يا فريدة؟؟؟
فريدة بتبص يمين وشمال وبعدين تقول:لا مفيش حاجه!

************************************

بعد ساعتين نزلوا التلت بنات للمطعم بتاع الفندق عشان يتغدوا وطبعا المطعم عبارة عن بوفيه فيه
انواع كتيرة من الاكل وكل واحد يختار الاكل اللي هو حابب ياكله ..
بسنت وروجينا قاعدين بعد ما اختاروا اكل..
فقامت بسنت بتبص بعيد على فريدة اللي لسه بتختار هتاكل ايه وقالت:
روجينا فيه حاجه غريبة حصلت!!
روجينا بقلق:ايه؟؟ ومالك بتتلفتي زي الحرامية كده ليه!!
بسنت:فريدة مخيفة اوووي يا روجينا!!
روجينا:ليه؟؟
بسنت:النهاردة واحنا نايمين ....
روجينا بتقاطعها:شششش خلاص خلاص جاية علينا .. غيري بسرررعة الموضوع
بسنت:بس بقى يا ستي وقلت لمحمد اننا بنتغدى
فريدة:عندهم السلاطات هنا شكلها تحفة
روجينا وبسنت بيبصوا ليها بقلق ويردوا:اممم
فريدة باستغراب:ايه مالكم؟
بسنت:لا مفيش
فريدة:ها هتروحوا فين؟
روجينا:انا عايزة اروح خليج نعمة ‘ اشتري شوية حجات وكده وبعدين نقعد نشربلنا حاجة
فريدة:تمام ..

****************************************

في معرض اللوح عم صابر قاعد بينضف اللوح ويمسحها من التراب وادم قاعد على مكتبه
بعد ما عم صابر يخلص اللوحة اللي في ايده يروح لادم ويقف قدامه بعدين يرجع يمشي
وبعدها بدقيقة يرجع تاني لادم ولسه هيمشي فأدم يقله:
في ايه يا عم صابر؟
صابر:معلش يا استاذ ادم بس كنت مضايق
ادم:عارف عشان خليتك تكدب على البنت اللي جت وسألت على لوحة جدتي الله يرحمها
صابر:ايوة يا استاذ ادم! بصراحة قلبي مكنش مطاوعني واحنا بنكذب عليها كده! ومش فاهم
ايه وجهة نظر سيادتك في الكدبة دي؟
ادم:عارف والله ولا انا قلبي طاوعني بس انا عملت كده عشان حاجة في دماغي بعدين هقلك
عليها..
صابر:بس البنت مشيت من عندنا يعيني حالتها تصعب على الواحد! دي صدقت انها مجنونة؟
ادم:اكيد مقصدش اني اطلعها مجنونة بس والله في حاجة في بالي لما جيت انت وقلتلي انها
بتصر على اللوحة دي بالزات فحبيت اشوف اللي في بالي صح ولا لا!
صابر:طب هتقلها امتى يا بني؟ وانا منظري هيبقى ايه لما اكون راجل في السن ده واكدب؟
ادم:متخفش يا راجل يا طيب انا هتحمل الليلة كلها..
صابر:عارف يا استاذ ادم .. فريدة دي فيها شبه منك! حتى طريقة الكلام !
ادم:هههههههههه
صابر:بس انت بس لو تبطل كده تخرج مع كل بنت وتركز يا بني..
ادم:يا عم صابر خليها على الله

******************************************

بعد يومين بتصحى فريدة من النوم الصبح بدري وتلبس فتشوفها بسنت:ايه رايحة فين بدري كده؟
فريدة:مفيش بس المدير اتصل بيا وقالي اروح اشوف الشاليه
بسنت:مش هتاخدينا معاكي؟
فريدة:ماهوا انتوا نايمين ومحبتش ازعجكم
بسنت:اممم طيب هتتأخري؟
فريدة باستغراب:مالك يا بسنت؟ هو انا عيلة خايفة لتوه!
بسنت بخوف:لا لا لا مقصدش بس انتي عارفة يعني اني بقلق وكده
فريدة:اممم لا يا ستي متقلقيش..

*****************************************

تخرج فريدة وتروح للعنوان اللي وصفه المدير واول ما توصل هناك تكلمه وتقوله:
ايوة يا استاذ امجد .. اه اه وصلت للقرية.. اه شفت الشاليه.. لا لا بصراحة تحفة.. ان
شاء الله..
وبعد ما تقفل تبص للسكيورتي اللي معاها وتقوله:
هو هنا فيه كام سكيورتي وكده؟ اصل المكان شكله فاضي فممكن اي حد ينط على اي شاليه
ويسرق وكده..
السكيورتي:لا حضرتك متخافيش احنا هنا تلت شفتات وبنبقى تلت مجموعات .. مجموعة
على البوابة الامامية ودول بيبقوا خمسة قاعدين ومعاهم اسلحة ومدربين وخمسة زيهم
على البوابة الخلفية وخمسة زيهم بردك بيتمشوا جوة القرية كلها .. واي تجاوز من اي
حد حتى من المقيمين نفسهم على قوانين القرية فورا بيتم التعامل معاه..
فريدة:طب والله كويس.. يعني الدنيا أمان هنا؟؟
السكيورتي:طبعا يا فندم ده غير اجهزة المراقبة والكاميرات اللي في كل حتة!
فريدة:ايه ده؟ حتى في الشاليهات؟؟
السكيورتي:لا يا فندم بيبقى فيه بس كاميرا على باب الشاليه لكن جوة لا! عشان لو لقدر
الله لقدر الله يعني حد من الامن مخدش باله من حد المراقبين على الكاميرات يشوفوه
قدام باب الشاليه..
فريدة:طب تمام اووي.. فيه حد مقيم هنا ولا انا هبقى طول السنة لوحدي وفي الصيف الاقي
الدنيا بقت زحمة؟
السكيورتي:لا حضرتك في القرية هنا مفيش غير حضرتك وشالهين كمان اللي قاعدين طول
السنة..
فريدة:اممم تمام..خلاص شكرا اوووي
السكيورتي:العفو.. هو حضرتك هتيجي من امتى؟
فريدة:ان شاء الله كمان تلت اسابيع..

***************************************

بعد اربع ايام رجعت فريدة تاني البيت ...
بابا فريدة:ولقيتي المكان هناك حلو؟
فريدة:اه اوي يا بابا وامان جداااا
مامة فريدة:بقلك ايه اعملي حسابك اول ما هتنزلي انا هاجي معاكي اسبوع ! اااه لازم اطمن
عليكي!! انا مش عارفة باباكي حاطط ايده في المية الباردة كده ليه..
فريدة:مية باردة ايه يا ماما!! الله هو انا رايحة اسافر برة ‘ وبعدين انا مش عارفة انتي قلقانة اوي
كده ليه..
مامة فريدة:بقلك ايييه ااااخر كلاااام هاجي يعني هاجي .. منا مش هطمن الا اما اشوف بعيني.. ااه
وبعدين ابقى اسيبك بقى وارجع لباباكي..
بابا فريدة:مامتك مش هترتاح الا لما تيجي بنفسها معاكِ
فريدة:طيب تعالي يا ستي..
وبعدين ترجع تقول لنفسها:انا مش فاهمة هو الكل بيتعامل معايا على اني غريبة الأطوار ليه!!
تدخل فريدة اوضتها وتقعد على المكتب اللي موجود في الاوضة وتسرح في ذاكرياتها....

**************************************

فريدة خارجة من محاضرة وعمالة تبص يمين وشمال ‘ بسنت جاية من بعيد وعمالة بتشاور
لفريدة بس فريدة مش واخده بالها...
بسنت لما توصل لفريدة:ايه يا بنتي؟ مالك واقفة كده ليه؟!
فريدة:بدور على مصطفى
بسنت:مصطفى مين!
فريدة:قصدي صاصو يعني
بسنت:اه ما تقولي صاصو!
فريدة:اصل قلقانة عليه
بسنت:ليه؟
فريدة:اصل بقالي اسبوع مشفتهووش
بسنت:محنا قلنالك يا فيري ‘ صاصو بيظهر يوم ويختفي عشرة!!
فريدة:طب انا هروح اسأل صحابه
بسنت تمسك فريدة من دراعها:استني هنا! هتسألي مين يا فيري؟ هو حد يعرفله صحاب اصلا!!
فريدة بعصبية:يووه هسأل اللي معاه في المحاضرات يعني.. اوووف وسعي بقى
بعد ما فريدة تمشي تكون جت تروجينا فتسأل باستغراب:
هي مالها فيري مضايقة ليه؟
بسنت:اختفاء كل شوية جه معاده
روجينا:صاصو بردو؟
بسنت:امال يعني حد غيره! مش محتاجة فقاقة!!
روجينا:طيب وهي راحت تسأل مين؟
بسنت:صحابه
روجينا:نعم! وده من امتى
بسنت:يوووه وانا مالي بقى هي اللي بتقول كده

***************************************

فريدة بتنزل من تاكسي وتبص في الورقة عشان تتأكد من العنوان اللي في الورقة..
((شارع 22 مصر الجديدة عمارة 5 ‘ الدور التاني ‘ شقة 24 ))
بتحاسب فريدة التاكسي وتطلع العمارة اللي واقفة قدامها وتوصل للشقة المطلوبة وتخبط الباب
وبعد دقيقة يفتح راجل عجوز واول ما يشوفها يقولها:
ازيك يا فريدة
فريدة بحرارة:ازيك انت يا جدو؟ عامل ايه؟ معلش انا جيت من غير معاد بس بكلم صاصو كتير
ومبيردش ومبيجيش الجامعة فقلقت..
الجد:ولا يهمك ‘ ده زي بيتك .. وحشتيني من اخر مرة شفتك فيها في النادي وانا عمال اقول
للواد صاصو يجيبك تاني ليا النادي وهو مطنشني..
فريدة بقلق:هو كويس؟
الجد بارتباك:اا ااه الحمد الله
فريدة:هو ماله؟
الجد:مم مفيش ‘ اا ... ااصل مناعته قليلة فبيتعب كتير ‘ ع ع عشان كده عشان كده مبيروحش
الجامعة كتير..
فريدة:طيب هو انا ممكن اشوفه؟
الجد:هو نايم يا بنتي دلوقتي.. اقلك اقعدي معايا نشرب شاي وبعدين نلعب دور كوتشينة ‘ يكون
هو صحي! اصله بياخد دوا يهده يعيني وبيخليه نايم مش حاسس بالدنيا..
فريدة بقلق:مممم طيب
وفجأة تحس فريدة انها في زمن غير الزمن وديكور البيت بيتغير وجد صاصو بيرجع يبقى شباب
ويكون قاعد بيلعب كوتشينة مع مامة صاصو وبابا صاصو ويضحك ويقول:
ههههههه هغلبكم يعني هغلبكم!
بابا صاصو:تغلب مين يا راجل ‘ لسه اللعب في اوله
الجد:طب انا قايم المطبخ هعمل شاي ‘ حد عايز شاي معايا
مامة صاصو:انا يا بابا
ولما يدخل الجد المطبخ ‘ تحس مامة صاصو بتعب فتقول لجوزها:
بقلك ايه ما تيجي نروَّح لحسن انا حاسة بدوخة فظيعة
بابا صاصو بعدم مبالاة:نروَّح نروَّح هو انتي كئيبة ليييه! وهنروَّح نعمل ايه في البيت؟!
نقعد في بوز بعض!! ولا نقعد نخنق بعض .. ما ادينا قاعدين مع ابوك بنلعب!!
مامة صاصو:ايوة يا حبيبي بس انا تعبانة اوي
بابا صاصو:بقلك ايه اكتمي بقى ‘ عشان ابوكي لو عرف انك تعبانة هيخليني اروّحك! ادينا
بنلعب والمزاج هيجلو فمتبقيش زي البومة وتقلبي القعدة..
مامة صاصو بانسكار:حاضر زي ما تحب
كل ده وفريدة واقفة بتتفرج على اللي بيحصل وفجأة تلاقي ديكور البيت بيرجع تاني زي ما هو
والجد واقف قدامها يقولها:فيه ايه يا بنتي؟
فريدة بقلق:ها؟ لا لا لا مفيش حاجة
الجد:طب تعالي العبي بقى معايا
فريدة:جدو ممكن تحكيلي عن بنت حضرتك شوية وعمو ؟؟
الجد:اشمعنا؟
فريدة بارتباك:لا عادي بس بب بس عشان لما بسأل صاصو مش بيحكيلي كتير
الجد:اصله ميوعاش اوي يا بنتي على مامته وباباه
فريدة:بس هما ماتوا وهو عنده 7 سنين صح يا جدو؟
الجد:ايوة.. بس بردو كان صغير
وفجأة يصحى صاصو ويخرج من الاوضة يلاقي جده قاعد مع فريدة ..
صاصو بارتباك واستغراب:فريدة! انتي جيتي هنا ازاي
فريدة لسه هتتكلم فيقول الجد:هي لما عرفت انك عيان عشان مناعتك الضعيفة فقالت تيجي
تزورك..
صاصو يبص لجده وبعدين يقول:ا اا اه
فريدة:خدت العنوان من زميل معاك في المحاضرة ودوخت لحد ما لقيته وعرفت اجيلك! وبعدين
يا مصطفى لما انت تعبان اوي كده ‘ ليه مبتقوليش..
صاصو:واقلك ليه!
بعدين يرجع يقول:قصدي يعني مش حابب اضايق حد بتعبي
فريدة:لا طبعا تضايق ايه يا صاصو !!
الجد:روح اغسل وشك يا صاصو عقبال ما اسخن االاكل وناكل كلنا..
يدخل صاصو عشان يغسل وشه فتقوم فريدة تقول للجد:هو ماله يا جدو؟
الجد بارتباك:معلش يا بنتي ‘ متزعليش هو صاصو كده حساس ومش بيحب يبين لحد ضعفه بس
هو طيب اووي وقلبه ابيض..
فريدة:منا حاسة بيه يا جدو عشان كده حابة اني اقرب منه بس ساعات بحس انه بعيد اوي عليا
الجد:تعالي بقى معايا ‘ اسخن الاكل لحسن عامل ملوخية هتاكلوا صوابعكم وراها..
فريدة:هههههه ايه ده يا جدو انت بتعرف تطبخ
الجد:اومااال! ده انا بررريمو
تدخل فريدة مع الجد واول ما تدخل ..............